വെയില് മുഴവന്‍ കൊണ്ടാ
കിളച്ചത് ,
ഇല്ലാത്ത കാശിറക്കിയാ
നനവും വളവും കൊടുത്തത്
വിയര്‍പ്പുരുക്കി തൂവിയാ
പരിപാലിച്ചത്
പുരക്കു വെച്ചത് എടുത്താ
പന്തലിട്ടത്
എന്നിട്ടിപ്പോ എന്തായി ?.
വേലിയും മതിലും ചാടി
അങ്ങേ പറമ്പിലെ
ചാമ്പ മരത്തെ ചുറ്റി
പൂവിട്ടു നില്‍ക്കുന്നു
എന്റെ സ്വന്തം മത്തവള്ളി
ആ
ചോന്ന പൂവിനെ
ഇരുട്ടില്‍
കഴുത്തറത്തിട്ടത്
ആരായിരിക്കും ?
കാലില്‍ പുരണ്ട
പൂമ്പൊടിയുടെ തെളിവില്‍
പൂമ്പാറ്റയാണെന്ന് ...
ഇടയ്ക്കിടെ
വഴക്കിട്ടിരുന്നു വെന്ന
ദൃക്സാക്ഷി മൊഴിയില്‍
കാറ്റാണെന്ന്...
ഒരു കരിവണ്ട്
തണ്ടുകള്‍ക്കിടയിലൂടെ
പൂവിനെ ലക്ഷ്യമാക്കി
നീങ്ങിയിരുന്നുവേത്രേ !
ഇലകള്‍ ക്കടിയില്‍
അങ്ങിങ്ങ്
ഉറുമ്പിന്‍ പറ്റങ്ങള്‍
തമ്പടിച്ചിരുന്നുവെത്രേ !
പകല്‍ മുഴവന്‍
വെളുക്കെ ചിരിച്ച്
കൂടെ തന്നെ ഉണ്ടായിരുന്ന
വെയിലിനെ
അന്തിക്ക് ശേഷം
കാന്മാനില്ലത്രേ !
ആ
ചോന്ന പൂവിനെ
ഇരുട്ടില്‍
കഴുത്തറത്തിട്ടത്
ഇവര്‍ ആരുമല്ലാതെ
ആരായിരിക്കും ?
